રાજય સરકારના પશુપાલન અને ગૌસંવર્ધન અને મત્સ્ય ઉદ્યોગ વિભાગના અગ્ર સચિવશ્રી ર્ડા. રાજીવકુમાર ગુપ્તાની અધ્યક્ષતામાં પાટણ તાલુકાના સમોડા, કુડેર, ડાભડી, રૂવાવી અને માતપુર ગામો ખાતે કન્યા કેળવણી મહોત્સવ અને શાળા પ્રવેશોત્સવના શાનદાર કાર્યક્રમો યોજાયા હતા. મહેમાનોનું કુમકુમ તિલક કરી સ્વાગત કરવામાં આવેલ હતું. મહેમાનો દ્વારા ધોરણ-૧માં પ્રવેશપાત્ર બાળકોને કુમકુમ તિલક કરી પ્રવેશ આપવામાં આવેલ હતો. નાના ભુલકાંઓ દ્વારા સ્વાગત ગીત રજુ કરવામાં આવેલ હતું. પાટણ તાલુકાના સમોડા પ્રા.શાળા ખાતે ૧૫, કડેર પ્રા.શાળા ખાતે ૧૪, ડાભડી પ્રા.શાળા ખાતે ૧૮, રૂવાવી પ્રા.શાળા ખાતે ૧૬ અને માતપુર પ્રા.શાળા ખાતે ૧૪ બાળકોને પ્રવેશ આપી મહેમાનો દ્વારા દફતર કીટ બાળકોને એનાયત કરવામાં આવી હતી. આંગણવાડી બાળકોને રમકડાંની કીટ એનાયત કરવામાં આવી હતી. ગ્રામજનો દ્વારા બાળકોને ભેટ આપવામાં આવી હતી. આ પ્રસંગે રાજય સરકારના પશુપાલન અને ગૌસંવર્ધન અને મત્સ્ય ઉદ્યોગ વિભાગના અગ્ર સચિવશ્રી ર્ડા. રાજીવકુમાર ગુપ્તાએ ગ્રામજનોને કન્યા કેળવણીનું મહત્વ અને સાક્ષરતાની વિવિધ યોજનાઓની માહિતી આપતાં જણાવ્યું હતું કે, શિક્ષણનું સમાજમાં ઘણું જ મહત્વ છે. સમાજમાં શિક્ષણ હશે તો સમાજ પ્રગતિશીલ રહેશે. ગામમાં કોઇપણ બાળક અભણ ન રહે તે જવાબદારી આપની છે. બાળકોને ધોરણ-૧ થી ૮ સુધીનું શિક્ષણ પુર્ણ કરાવવા ઉપર ભાર મુકયો હતો. ગામમાં કોઇપણ દિકરી અભણ ન રહે તે માટે ખાસ કન્યા કેળવણીની વિવિધ યોજનાઓ રાજય સરકારે કાર્યરત કરી છે. છ વર્ષથી ચાલતા શાળા પ્રવેશોત્સવ થકી શિક્ષણનો વ્યાપ વધ્યો છે. દિકરીઓ ભણતી થઇ છે. બાળકોને વ્યસનથી દુર રાખવા જણાવ્યું હતું. આંગણવાડી શિક્ષણનું પ્રથમ પગથિયું છે. જેમાં સરકાર દ્વારા બાળકોને ઉચ્ચ ગુણવત્તા ધરાવતા તત્વોથી ભરપુર પૈષ્ટિક આહાર આપવામાં આવે છે. જેનાથી બાળકોના સર્વાંગી વિકાસ માટે ઉપયોગી છે. જેનો લાભ લેવા ગ્રામજનોને જણાવ્યું હતું.
આ પ્રસંગે પ્રાથમિક શાળાઓમાં શિક્ષકો માટે પુસ્તક તરતું મુકવામાં આવ્યું હતું. બાળકોના કીટના દાતા તેમજ તિથી ભોજનના દાતાઓનું પણ સન્માન કરવામાં આવ્યું હતું.
આ પ્રસંગે લાયઝન અધિકારીશ્રી ઉદયભાઇ પરમાર, સી.આર.સી. રણુંજના જયંતીભાઇ સાધુ, જિલ્લા યુવા ભાજપના શ્રી સંજયભાઇ પટેલ, પાટણ નગરપાલિકાના સદસ્યશ્રી મુકેશભાઇ લીંબાચીયા, બી.આર.સી. ચાણસ્માનાશ્રી કાનજીભાઇ દેસાઇ, બીટ કેળવણી નિરીક્ષક શ્રીમતી મુળીબેન પટેલ, શિક્ષકગણ, બાળકો અને મોટી સંખ્યામાં ગ્રામજનો ઉપસ્થિત રહયા હતા.
ટિપ્પણીઓ નથી:
ટિપ્પણી પોસ્ટ કરો