અમરેલી તા. ૧૭ જુન,૨૦૧૧ શાળા પ્રવેશોત્સવ અને કન્યા કેળવણી અંતર્ગત લાઠી તાલુકાના અકાળા, લુવારીયા પ્લોટ અને કૃષ્ણગઢ ખાતે ગુજરાત રાજ્ય કૃષિ બોર્ડ-ગાંધીનગરના અધ્યક્ષશ્રી રમણભાઇ પટેલ (જાની) ઉપસ્થિત રહ્યા હતા. તેઓએ ૩૯ કુમાર અને ૩૨ કન્યા સહિત કૂલ ૭૧ બાળકોને શાળામાં પ્રવેશ અપાવ્યો હતો.
ગુજરાત રાજ્ય કૃષિ બોર્ડના અધ્યક્ષશ્રી રમણભાઇ પટેલ (જાની)એ સરસ્વતી સાધના યાત્રાની શરૂઆત કરનાર ચરણાર્થીઓ એવા બાળકોને ઉજજ્વળ ભાવિ માટે શુભકામના પાઠવી માતા-પિતા તથા વડીલોને તેના બાળકને પ્રાથમિક શિક્ષણના મૂળભૂત અધિકારથી વંચિત ન રાખવા અનુરોધ કર્યો હતો. નબળી આર્થિક પરિસ્થિતિને લીધે અભ્યાસ ન કરાવી શકતા માતા-પિતાને હવે પોતાના બાળકના શિક્ષણ માટે ચિંતા કરવાની આવશ્યકતા રહેતી નથી, કારણ કે, રાજ્ય સરકાર દ્વારા મફત શિક્ષણ સુવિધા, સાયકલ, ગણવેશ અને શિષ્યવૃત્તિ તથા વિદ્યાલક્ષ્મી બોન્ડ અને અન્ય સહાય પૂરી પાડવામાં આવે છે. પ્રાથમિક શિક્ષણ એ જ્ઞાન પ્રાપ્તિનું પ્રથમ પગથિયું છે ત્યારે પ્રવેશપાત્ર બાળકોના માતા-પિતાએ ઉપસ્થિત રહી ઉત્સાહ દાખવ્યો તે બદલ અભિનંદન પણ અધ્યક્ષશ્રી રમણભાઇ પટેલ (જાની)એ પાઠવ્યા હતા.
શાળામાં પ્રવેશ લેનાર બાળાઓની માતાઓને પોતાની બાળકીને ભણતર પૂર્ણ ન થાય ત્યાં સુધી ભણતી ન ઉઠાડે તે માટે સંકલ્પ પ્રતિકે સાડી આપવામાં આવી હતી. પ્રવેશપાત્ર બાળકોને મોં મીઠું કરાવી કુમકુમ તિલક કરી શાળાના સ્ટાફ તથા દાતાશ્રીઓના આર્થિક સહયોગથી પ્રવેશપાત્ર બાળકોને સ્કૂલ બેગ, પાટી-પેન આપવામાં આવેલ. ઉપરાંત બાળકોને આરોગ્યપ્રદ ચોકલેટ આપવામાં આવી હતી. આંગણવાડીમાં પ્રવેશ મેળવનાર બાળકો માટે ટ્રાયસિકલ અને પૌષ્ટિક વાનગી હરિફાઇ સ્પર્ધામાં સિધ્ધી મેળવનાર આંગણવાડીની બહેનોને ઇનામ વિતરણ કરવામાં આવેલ. આ તકે શાળાના પટાંગણમાં વૃક્ષારોપણ પણ કરવામાં આવેલ.
રાજ્ય સરકાર સ્ત્રીશિક્ષણ અંગે ખાસ કાળજી લઇ રહી હોય ત્યારે માતા-પિતા પણ પોતાની દીકરીનું ભાવિ ઉજ્જવળ બની રહે તે માટે દીકરીના અભ્યાસને અધવચ્ચેથી જ પડતો ન મૂકાવવા શ્રી મનુભાઇ આદ્રોજાએ પ્રાસંગિક પ્રવચનમાં જણાવ્યું હતું.
બાળાઓએ મહેમાનોનું પુસ્તક તથા કુમકુમ તિલક કરી સ્વાગત કર્યુ હતું. સમગ્ર કાર્યક્રમનું સફળ સંચાલન કિશોરભાઇ ગોસાઇએ કરેલ. શાબ્દિક સ્વાગત તાલુકા પંચાયત પ્રમુખ શ્રી ભરતભાઇ સુતરિયાએ અને આભારવિધી શાળાના આચાર્યશ્રી નાથાભાઇ રાઠોડે કરી હતી.
આ તકે સરપંચ શ્રી પ્રવીણભાઇ મુલાણી, અરજણભાઇ વામજા, જયસુખભાઇ સિરોયા,સલીમભાઇ લોહીયા અને ગ્રામજનો ઉપસ્થિત રહ્યા હતા.
ટિપ્પણીઓ નથી:
ટિપ્પણી પોસ્ટ કરો