જેતપુરના પ્રાચીન મંદિર નજીક જ માંસ-મટનની મહેફિલ !!
મંદિરના મહંત સહીત હિન્દુઓનું જેતપુરના મામલતદાર,
DYSP-પાલિકાના મુખ્ય અધિકારીને પાઠવાયું આવેદન...
મંદિરના જ બાંધકામમાં ગેરકાયદેસર રૂમો બાંધી આચરાતી હિન્દુઓની લાગણી દુભાવે તેવી ગેરપ્રવુત્તિઓ ટૂંક દિવસોમાંજ બંધ ના કરાવાય તો ૫૦૦ સાધુ સંતો સાથે આંદોલન છેડવાની ચીમકી ઉચ્ચારતા મહંત આત્માનંદજી ! સાધુ સંતોમાં રોષ...
જેતપુર તા.૨૫
જેતપુરમાં ભાદર કાંઠે આવેલ એક અતિ પ્રાચીન મંદિરના એક તત્કાલીન મહંતની ઉદારતાનો લાભ ઉઠાવી મંદિરની ભાડે રાખેલી જગ્યામાં માંસ-મટનનો ખાવામાં ઉપયોગ કરી હિન્દુઓની લાગણી દુભાતી હોય આજે આ મંદિરના મહંત સહિતના સાધુ સંતોએ સ્થાનિક વિભાગીય પોલીસ અધિકારી, પાલિકાના ચીફ ઓફિસર અને મામલતદારને આવેદનો આપી તાત્કાલિક ઘટતું ના કરાય તો આંદોલન છેડવાની ચીમકી ઉચ્ચારી હતી.
મળતી વિગતો મુજબ જેતપુરના ભાદરના કાંઠે આવેલ અતિ પ્રાચીન શ્રી નૃશિહજી મંદિરની પેટા જગ્યા એટલેકે હિંદુ સ્મશાનની બાજુમાં આવેલ અંદાજીત ૨૦૦૦ વાર જેટલી જગ્યા આ મંદિરના તત્કાલીન મહંતે એક બાવાજીને ગાયોના ઘાસચારાની વ્યવસ્થા માટે આપી હતી.
પણ સમય જતા મહંતની ઉદારતાનો દુરુપયોગ કરી આ બાવાજી પરિવારે મકાનો બાંધી અન્યોને ભાડે આપી, માંસ મટન ખુલ્લેઆમ બનાવી, આરોગી હિન્દુઓની લાગણી દુભાવતા હોવાની વાત ત્રાસદાયક બની જતા, આ વાતને વધતી અટકાવવા, કસુરવારો સામે પગલા ભરવા આજે નૃશીહજી મંદિરના મહંતશ્રી આત્માનંદજી બાપુ, ખાખા મઢી મંદિરના પહેલવાનબાપુ, જેતપુર પાલિકા સદસ્યા શારદાબેન એચ. વેગડા સહીત સાધુ સંતો અને સેવાભાવીઓએ આજે પ્રથમ અહીના વિભાગીય પોલીસ અધિકારી પાટીલ, મામલતદાર જીતેન્દ્ર ભોરણીયા તેમજ પાલિકાના ચીફ ઓફિસરને આવેદનો આપ્યા હતા.
આવેદનો આપતી વખતે સદસ્યા શારદાબેન તેમજ સાધુ સંતોએ જણાવેલ કે ટૂંક દિવસોમાંજ મંદિર નજીકની આવી પ્રવુત્તિઓ બંધ નહિ કરવામાં આવે તો ન્યાય માટે આંદોલનાત્મક માર્ગો અપનાવાશે.
બોક્સ: ગે.કા.કબજેદારો મારવા દોડે છે : મહંત આત્માનંદજી
જેતપુર : મહંત આત્માનંદજીએ પોલીસ, પાલિકા અને મામલતદારને આવેદન આપતી વેળાએ જણાવેલ કે, મંદિરની જગ્યામાં ગેરકાયદેસર કબજો જમાવી બેઠેલા તત્વોને આવી હીન પ્રવુત્તિઓ બંધ કરવા કોઈ વખત ટપારીયે છીએ તો માથાભારે અને ઝનૂની સ્વભાવના તત્વો મારવા દોડે છે. એક તો મંદિરની જમીન છે. ઉપરથી ચોરી ઉપર સીનાજોરી જેવું વર્તન કરે છે. આ બધું તાત્કાલિક બંધ નહિ કરાવાય તો સાધુ સંતોની જમાત આંદોલન કરશે એવું કોઈ નહિ કરે તેવી મહંતે ચીમકી ઉચ્ચારી હતી.
ફોટો અને સમાચાર : કશ્યપ જે.જોશી જેતપુર
