જેતપુરના લુણાગરા ગામે વીજ કર્મીને ફરજમાં રુકાવટ ઉભી કરી
મારી નાખવાની ધમકી આપનાર ખેડૂતને 2 મહિનાની સજા ફટકારતી જેતપુરની કોર્ટ
જેતપુર તા.24
જેતપુર તાલુકાના લુણાગરા ગામે આજથી 3 વર્ષ પહેલા એક વીજ કર્મચારીને ફરજમાં રુકાવટ ઉભી કરી જાનથી મારી નાંખવાની ધમકી આપનાર એક ખેડૂતને જેતપુરની કોર્ટે ગઈ કાલે 2 મહિનાની સજા અને રૂપિયા 500 નો દંડ ફટકાર્યો હોવાનું સરકારી વકીલ ડી.બી.પંચાલે જણાવ્યું હતું.
આ બાબતે મળતી વિગતો મુજબ જેતપુર વીજ કંપનીની ગ્રામ્ય પેટા વિભાગ કચેરીના સર્વેયર ડાયાભાઇ લખમણભાઈ ભુવા આજથી 3 વર્ષ પહેલા એટલેકે તા. 19-5-2012 ના રોજ જેતપુર તાલુકાના લુણાગરા ગામે એચવીડી-5 ફીડરનું અન્ય સ્ટાફ સાથે કામકાજ કરી રહ્યા હતા.
ત્યારે કેશુ ભૂરા ભૂવાના પુત્ર રસિક કેશુએ લોખંડનો પાઈપ લઈને ડાયાભાઇ પાછળ દોડી, ફરજમાં રુકાવટ ઉભી કરી જાનથી મારી નાંખવાની ધમકી આપતા ડાયાભાઇ સહિતનો વીજકંપનીનો સ્ટાફ ગામમાંથી ચાલ્યો ગયો હતો.
દરમિયાન વીજકર્મી ડાયાભાઇએ વીરપુર પોલીસમાં ફરિયાદ નોંધાવતા પોલીસે રસિક કેશુ સામે 504, 506(2), 186 અને જીપીએક્ટ ની કલમ 135 મુજબ ગુનો નોંધી ધોરસરની કાર્યવાહી હાથ ધરી હતી.
બીજીબાજુ પોલીસે પૂરતા પુરાવાઓ સાથે ચાર્જશીટ કોર્ટમાં રજુ કરેલ. જે બનાવનો કેઈસ ગઈકાલે મીન જ્યુડી.મેજી.ફ.ક. ડી.જે.રાજપૂત(જેતપુર)ની કોર્ટમાં ચાલી જતા, એપીપી ડી.બી.પંચાલની દલીલોને ધ્યાને લઇ જજ રાજપૂતે આરોપી રશિક કેશુને આઈપીસી કલમ 186 માં તકસીરવાન ઠેરવી 2 માસની સજા અને રૂપિયા 500 નો દંડ તેમજ દંડ નાં ભરે તો 15 દિવસની સજાનો હુકમ કર્યો હતો. કોર્ટસુત્રોએ જણાવેલ કે હાલતા ચાલતા સરકારી કર્મચારીઓની ફરજમાં રુકાવટ કરનાર તત્વો માટે આ ચુકાદો લાલબત્તી સમાન ગણાવી શકાય.
કશ્યપ જે.જોશી જેતલસર જેતપુર 9974262812
