વડોદરા:
વિઘાના વાર ગુરુવારથી શરૂ થતા આ વર્ષના ત્રણ દિવસના કન્યા કેળવણી મહોત્સવની વિશેષતા એ રહેશે કે પહેલા ધોરણમાં ભણતર શરૂ કરનારી દિકરીઓની સાથે પ્રાથમિક શાળાઓમાં સમાવી લેવાયેલા આઠમા ધોરણમાં પ્રવેશ મેળવનારી દિકરીઓને પણ બીજી માતા જેવી શાળાઓના આંગણે હરખભેર આવકારવામાં આવશે. ગુજરાતની દિકરીઓને વિદુષી બનાવવાની નેમ સાથે રાજયના મુખ્ય મંત્રીશ્રી નરેન્દ્રભાઇ મોદીએ લીધેલા કન્યા કેળવણી માટે ભિક્ષુક બનવાના ભેખનું આ નવમું વર્ષ છે. મુખ્યમંત્રીશ્રી વતી જિલ્લામાં શાળા પ્રવેશ કરનારી દિકરીઓને વધાવવાનું નેતૃત્વ મહિલા અને બાળ વિકાસ મંત્રી શ્રીમતી આનંદીબેન પટેલ કરશે. તેઓ પાદરા તાલુકાના ડભાસા ગામે સવારના ૭.૩૦ કલાકે જિલ્લાના કન્યા કેળવણી અને શાળા પ્રવેશોત્સવનો પ્રાથમિક શાળામાં શુભારંભ કરાવશે. તેઓશ્રી દિવસ દરમિયાન મુવાલ, કણઝટ અને મોભા ગામોમાં પણ પ્રવેશોત્સવમાં જોડાશે. પ્રવાસન રાજય મંત્રીશ્રી જિતેન્દ્રભાઇ સુખડિયા કરજણ તાલુકાના ગણપતપુરા ગામે કન્યા કેળવણી મહોત્સવ યોજાયા બાદ ગંધારા, કુરાલી વેમાર અને મેથી ગામોની પ્રાથમિક શાળાઓમાં જશે.
જયારે સંસદિય સચિવશ્રી યોગેશભાઇ પટેલ ડભોઇ તાલુકાના શિરોલા, પિસાઇ, કનાયડા અને ગામડી ગામોમાં શાળા પ્રવેશ મેળવનારાઓને આવકારવાની સાથે "દિકરો હોય કે દિકરી, ભણતર સહુનો અધિકાર'નો સંદેશ આપશે. સાંસદશ્રી બાળકુષ્ણ શુકલ, સાવલી તાલુકાના ખાખરીયા, ઉત્તમનગર, મુઢેલા, સાદરાલ અને આદલવાડાની ગામઠી શાળાઓમાં જશે જિલ્લા પંચાયત અધ્યક્ષ, નિગમ અધ્યક્ષો ધારાસભ્યો પણ કન્યા કેળવણીના યજ્ઞમાં યોગદાન આપવાના છે.
રાજયના પોલીસ વડાશ્રી ચિત્તરંજનસિંધ પણ કાલથી ત્રણ દિવસ વડોદરા જિલ્લાના આદિવાસી વિસ્તારને ખુંદી વળશે પ્રથમ દિવસે તેઓ છોટાઉદેપુર તાલુકાના હવાલપુરા, સુરસી, નકામલી, અંબાલા અને પાડલીયાના કેવવણીમાં અતિપછાત ગામોમાં જશે. તેવી જ રીતે રાજયના વન વિભાગના વડા-અગ્ર મુખ્ય વન સંરક્ષકશ્રી પ્રદીપ ખન્ના વાધોડિયા કન્યા શાળા-૨, ગજાદરા, નર્મદાપુરા, ગુલામપુરા અને અલવા ગામની પ્રાથમિક શાળાઓમાં પ્રથમ દિવસે કન્યા કેળવણી મહોત્સવમાં જોડાશે.
જિલ્લાના પ્રાથમિક શિક્ષણ વિભાગે અને નવતર પહેલના રૂપમાં કન્યા કેળવણી મહોત્સવની સાથે શાળાઓમાં "દિકરી દિવસ' ઉજવવાનું આયોજન કર્યું છે. જેના હેઠળ પહેલાં અને આઠમા ધોરણમાં પ્રવેશ મેળવનારી દિકરીઓની સાથે શૈક્ષણિક સિદ્ધિ મેળવનારા કન્યા રત્નોનું સન્માન કરવામાં આવશે. કન્યા કેળવણી મહોત્સવની સાથે નવા શાળા વર્ગો, કમ્પાઉન્ડ વોલ મભયો ખંડ, સેનીટેશન યુનીટસ, પ્રજ્ઞા વર્ગોનું લોકાર્પણ - ખાતમૂહૂર્ત પણ કરવામાં આવશે.
ટિપ્પણીઓ નથી:
ટિપ્પણી પોસ્ટ કરો