આગામી ૨૦ થી ૨૭ જુલાઇ-૨૦૧૧ સાજ દિવસ સુધી મહેસાણાના પોલીસ પરેડ ગ્રાઉન્ડ ખાતે લશ્કરી ભરતી મેળો યોજાનાર છે.જેમાં ગુજરાત ભરમાંથી મોટી સંખ્યામાં યુવાનો ઉમટી પડશે.
અધિક જિલ્લા નિવાસી કલેકટરશ્રી આર.કે. પટેલના અધ્યક્ષ સ્થાને ભરતી મેળાના આયોજન માટે બેઠક યોજવામાં આવી હતી.જેમાં ભરતી દરમિયાન કાયદો અને વ્યવસ્થાની સ્થિતિ અઠવાડીયા સુધી સતત જળવાઇ રહે, ઉમેદવારોને પીવાનું પાણી મળે,શારીરિક ચકાસણી વખતે જરૂરતમંદ ઉમેદવારોને મેડીકલ સગવડ પ્રાપ્ત થાય તે માટે ઘનિષ્ટ આયોજન ગોઠવવામાં આવ્યું છે.
પોલીસ પરેડ ગ્રાઉન્ડ મહેસાણા ખાતે યોજાનાર લશ્કરી ભરતી મેળામાં અંદાજે ૧૦,૦૦૦ જેટલા યુવાનો રાજ્યભરમાંથી ઉમટી પડે તેવી ધારણા બાંધવામાં આવી છે. ઉમેદવારોને પીવાના પાણી માટે ૩ ટેન્કર,શૌચાલય માટે મોબાઇલ સેનીટેશન બ્લોક,ફાયર ફાઇટર મેડીકલ ટીમ સાથેની એમ્બ્યુલન્સ વાન, ચોમાસા અને વરસાદને ધ્યાનમાં રાખી યુવાનો માટે અર્બુદા હોલ,રેલ્વે ફાટક પાસે રેન બસેરાની વ્યવસ્થા જિલ્લા રોજગાર કચેરી દ્વારા કરવામાં આવી છે.
પોલીસ પરેડ ગ્રાઉન્ડ ખાતે યુવાનોને ચા-નાસ્તો મળી રહે તે માટે જિલ્લાના સખીમંડળો નાસ્તા સ્ટોલ લગાવશે, ઉપરાંત રેલ્વે સ્ટેશન તેમજ બસ સ્ટેશન ખાતે ઉમેદવારોને નાહવાની વ્યવસ્થાનું આયોજન કરવામાં આવ્યું છે.રોજગાર વિનિમય કચેરી દ્વારા ગાઇડન્સ સ્ટોલ્સ,પોસ્ટર્સ,વ્યવસાયલક્ષી માર્ગદર્શન કેન્દ્ર,જિલ્લા આરોગ્ય કચેરી દ્વારા એઇડસ પ્રદર્શન,નશાબંધી કચેરી દ્વારા વ્યસનમુક્તિ અને નશાબંધી જાગૃતિ અર્થે પ્રદર્શન ગોઠવવામાં આવશે.પરેડ ગ્રાઉન્ડ ખાતે હેલોજન લાઇટસની પણ વ્યવસ્થા ઉપરાંત પરેડ ગ્રાઉન્ડની બહારની સાઇડે ટેન્ટ બાંધીને પરેડ ગ્રાઉન્ડથી બી.એસ.એન.એલ કોલોની સુધી રેન બસેરા, ઉપરાંત દાળ,ભાત,પૂરી,શાક જેવું સાત્વિક ભોજન ઉમેદવારોને મળે તે અંગે પણ વિશેષ ચર્ચાઓ કરવામાં આવી હતી.
આ બેઠકમાં કલેકટર કચેરીના એમ.પી.ખત્રી,નાયબ પોલીસ અધિક્ષકશ્રી ગામીત,મેડીકલ ઓફિસરશ્રી સેતલવાડ સહિત જિલ્લાની અન્ય કચેરીઓના અધિકારીઓએ ઉપસ્થિત રહીને વિસ્તૃત ચર્ચા હાથ ધરી હતી.
ટિપ્પણીઓ નથી:
ટિપ્પણી પોસ્ટ કરો