મૂળ રાજકોટના ગુજરાતી અધિકારી શ્રી સુજન આર. ચિનોયની મેક્સિકો ખાતેના ભારતીય રાજદૂત પદે નિમણુંક વિદેશ મંત્રાલયના પ્રથમ ગુજરાતી અધિકારીની ઉચ્ચ હોદ્દા પર વરણી

અત્યારે વિદેશ મંત્રાલયમાં અધિક સચિવ અને વરિષ્ઠતમ ગુજરાતી અધિકારી શ્રી
સુજન આર. ચિનોયની ભારતના મેક્સિકો ખાતેના આગામી રાજદૂત તરીકે નિમણુંક
કરવામાં આવી છે. આવી નિમણુંક મેળવનારા શ્રી ચિનોય પહેલા ગુજરાતી છે૧૯૮૧
બેચના ભારતીય વિદેશ સેવાના અધિકારી શ્રી ચિનોય રાજકોટના ખ્યાતનામ
પરિવારમાંથી આવે છે. એમના દાદા બેરિસ્ટર સી.એન. ચિનોય, આઝાદી પૂર્વે
રાજકોટ રાજયના દીવાન હતા.
શ્રી ચિનોય ચીન અને પૂર્વી એશિયાને લગતી બાબતો પર પ્રભુત્વ ધરાવે છે અને
કમ્યુનિસ્ટ દેશની મહત્વપૂર્ણ મુલાકાતો વખતે ભારતીય નેતાઓની સાથે વર્ષો
સુધી જતા રહ્યા છે. ૨૦૦૨થી ૨૦૦૫ વચ્ચે ભારતના શાંગહાઈ ખાતેના કોંસ્યુલ
જનરલ તરીકે અને ત્યાર પછી ૨૦૦૮ સુધી સિડની ખાતેના કોંસ્યુલ જનરલ તરીકે,
શ્રી ચિનોયે ભારતના વિદેશ વેપાર અને આર્થિક બાબતો અંગે ઉત્તમ કાર્ય
કર્યું છે.
૧૯૮૦ના દાયકામાં શ્રી ચિનોય હોંગકોંગ અને બેઈજિંગ ખાતેના ભારતીય મિશનોમાં
વિવિધ પદે કાર્યરત રહ્યા હતા અને ૧૯૮૮માં દિવંગત વડાપ્રધાન રાજીવ ગાંધી,
૧૯૯૨માં પૂર્વ રાષ્ટ્રપતિ આર. વેંકટરામન તથા ૨૦૦૦માં પૂર્વ રાષ્ટ્રપતિ
કે. આર. નારાયણનની ચીનની મુલાકાતો વખતે એમની સાથે રહ્યા હતા. એમણે ભારતના
૧૯૯૮માં પરમાણું પરીક્ષણના સમયે અને તે પછી ચીન સાથેના દ્વિ-પક્ષીય
સંબંધોને સુધારવામાં મહત્વનો ભાગ ભજવ્યો હતો.
એમણે વિદેશ મંત્રાલયના પૂર્વ-એશિયા વિભાગમાં ચીનને લગતી બાબતોના ઉપ-સચિવ/
નાયબ સચિવ, અમેરિકા વિભાગમાં નાયબ સચિવ અને વિદેશ મંત્રાલયના જ પ્રચાર
વિભાગમાં પ્રેસ રિલેશન અંગેના ઓફિસર ઓન સ્પેશિયલ ડ્યુટી(વિશેષ
કાર્યાધિકાર) ફરજો બજાવી છે.
૧૯૯૨થી ૧૯૯૫ સુધી ન્યુયોર્ક ખાતે સંયુક્ત રાષ્ટ્રો (યુ.એન) માં ભારતના
સ્થાયી મિશન માં પ્રથમ સચિવ/કાઉંસેલર તરીકે, એમણે યુ.એન.ની સુરક્ષા
પરિષદમાં અસ્થાયી સભ્ય તરીકે ભારતના દાવા સહિત વિવિધ બહુપક્ષીય મુદ્દાઓના
સમાધાન માટે પ્રયત્નો કર્યા. યુ.એન. ની સાધારણ સભાની પ્રથમ સમિતિમાં
નિઃશસ્ત્રીકરણ, નોન-પ્રોલિફરેશન અને આંતરરાષ્ટ્રીય સુરક્ષા અંગેની
બાબતોમાં એમણે ભારતનું પ્રતિનિધિત્વ કર્યું. એમણે ૧૯૯૦ના દસકામાં રિયાધ
ખાતેની એલચી કચેરીમાં કાઉંસેલર )પોલિટિકલ(અને એ પછી વિદેશ મંત્રાલયમાં
ચીન અંગેની બાબતોના નિયામક તરીકે ચાર વર્ષ સુધી ભારત- ચીન સરહદના
વિસ્તારોમાં લાઈન ઓફ એક્ચ્યુઅલ કંટ્રોલ પર શાંતિ, સુલેહ અને પરસ્પર
વિશ્વાસને ઉત્તેજન આપવાનું કાર્ય કર્યું.
૨૭મી સપ્ટેમ્બર, ૧૯૫૮ના રોજ જન્મેલા, શ્રી ચિનોય એમનું પ્રાથમિક શિક્ષણ
રાજકોટ ખાતેની રાજકુમાર કોલેજમાં લીધું. એમણે વડોદરા ખાતેની એમ. એસ.
યુનિવર્સિટીમાંથી અંગ્રેજી સાહિત્ય અને માનસશાસ્ત્ર સાથે બી.એ ઓનર્સ
કર્યું અને અમદાવાદથી માર્કેટિંગમાં એમ.બી.એ.ની પદવી પ્રાપ્ત કરી. તેઓ
ચીની ભાષા કુશળતાપૂર્વક બોલી શકે છે અને ફ્રેંચ, જર્મન , અરેબિક અને
ક્રિઓલ ભાષાઓ પર પણ પ્રભુત્વ ધરાવે છે.