જ્ઞાન અને વિકાસના આ યુગમાં બાળકોને સારૂ ભણાવ્યા વગર ચાલે તેમ જ નથી. શહેરોમાં સારી સ્કુલોમાં ભણતાં કે પૈસાદાર લોકોનાં જ બાળકો સારૂ ભણી આગળ વધી શકે આવી માન્યતા સાવ ખોટી જ છે. એક પ્રકારની ગેરસમજ કે અજ્ઞાન છે. છેવાડાના નાના ગામડાઓની શાળામાં ખેડૂત કે ખેતમજુરોના બાળકો ખુબ સારૂ ભણીને નિષ્ણાત ર્ડાકટરો, એન્જીનીયરો, અધિકારીઓ, ઉધોગપતિઓ અને સારા વેપારીઓ બનતા જ રહે છે. બુધ્ધિ, સંસ્કારો અને આવડત એ તો કૂદરતની કૃપા જ ગણાય. ઘણા મહાન માણસોના બાળપણ ગરીબી અને મુશ્કેલીઓથી ભરેલા હોય છે. છતાં તેઓ પોતાની બુધ્ધિશકિતથી સમગ્ર વિશ્વને પ્રેરણા આપી શકે તેટલા ઉચ્ચ સ્થાન સુધી પહોંચી શકે છે.
વેકેશન પૂર્ણ થતાં શાળાઓમાં નવા સત્રનો પ્રારંભ થઇ ગયો છે. શાળાઓ ખુલતાં બાળકોમાં નવો જ ઉત્સાહ જોવા મળે છે. માત્ર એક, બે, દિવસ પછી જ એટલે કે તા. ૧૬, ૧૭, અને ૧૮ જૂન દરમિયાન સમગ્ર રાજયમાં કન્યા કેળવણી મહોત્સવ અને શાળા પ્રવેશોત્સવની શાનદાર ઉજવણી કરાશે. બનાસકાંઠા જીલ્લામાં પણ જીલ્લા વહીવટીતંત્ર દ્વારા આ માટે તડામાર તૈયારીઓ કરીને વ્યાપક આયોજન કરવામાં આવ્યું છે. આ ઉજવણી પ્રસંગે જીલ્લાના ૧૨૪૮ ગામડાઓમાં કૂલ ૮૫ રૂટમાં મંત્રીશ્રીઓ, પદાધિકારીશ્રીઓ, ઉચ્ચ સનદી અધિકારીશ્રીઓ તથા જીલ્લા અને તાલુકા કક્ષાના અધિકારીશ્રીઓ આ પ્રસંગે ઉપસ્થિત રહી પ્રવેશ મેળવનાર નાના બાળકોનું સ્વાગત કરીને શાળા પ્રવેશ અપાવી શુભેચ્છાઓ આપશે. તેમજ સો ટકા નામાંકન થાય અને શિક્ષણ માટે લોકોમાં વધુ જાગૃતિ આવે તે માટે માર્ગદર્શન આપશે. એ જ પ્રમાણે જીલ્લાના છ શહેરી વિસ્તારોમાં તા. ૨૩, ૨૪, ૨૫ જૂન દરમિયાન ૧૪ રૂટમાં આ કાર્યક્રમની ઉજવણી કરાશે.
શાળા પ્રવેશોત્સવ પ્રસંગે બાળકોના ઉત્સાહના સહભાગી બની તેને સારૂ માર્ગદર્શન આપીએ. શાળા પ્રવેશોત્સવના દિવસે બાળકના પરિવારજનોએ અચુકપણે શાળામાં જવુ જોઇએ. આ ઉજવણીમાં બાળકની સાથે તેનો પરિવાર પણ સામેલ થશે તો બાળકનો ઉત્સાહ અનેકગણો વધશે. બાળક શાળામાં પ્રવેશ મેળવે પછી કાળજીપૂર્વક તેના અભ્યાસમાં રસ લઇએ. તેને માર્ગદર્શન અને પ્રેરણા આપતા રહીએ. અભ્યાસમાં તેનો રસ જળવાઇ રહેશે તો તે ખુબ સારૂ ભણવાનો જ છે. દીકરા દીકરીના જરાપણ ભેદભાવ વિના બાળકોનો સમાન ઉછેર કરી ભણાવીએ. ગુજરાતમાં ઠેર-ઠેર શિક્ષણની વ્યાપક સુવિધાઓ હવે ઉપલબ્ધ છે. બાળકને ઉચ્ચ અભ્યાસ સુધી ભણવા કે વિદેશ ભણવા જવા રાજય સરકાર ઉદાર હાથે મદદ કરે છે. કોઇ ચિંતા કરવાની જરૂર નથી. આપણે તો બસ કાળજીપૂર્વક આપણા દીકરા-દીકરીને ભણાવીએ.
લેખનઃ- માનસિંહ સિસોદીયા
ટિપ્પણીઓ નથી:
ટિપ્પણી પોસ્ટ કરો