રાજકોટ– રાજયના મહેસૂલ તેમજ માર્ગ અને મકાન વિભાગના મંત્રી શ્રીમતિ આનંદીબેન પટેલના હસ્તે તા. ૧૦-૬-૧૧ના રોજ બપોરે ૪-૦૦ વાગે ગોંડલ ખાતે રૂ. ૧૦૩૧,૫૪ લાખના ખર્ચે નવનિર્મિત અદ્યતન સેવાસદનનું લોકાર્પણ થશે. રાજયના માર્ગ અને મકાન વિભાગ દ્વારા ગોંડલના ડેરી બિલ્ડિંગ કેમ્પસમાં ત્રણ માળનું અદ્યતન સંકૂલ બંધાયું છે. જેમાં સરકારશ્રીની ૧૮ જેટલી કચેરીઓ બેસશે. જેને કારણે તાલુકાની આમ જનતાને આ સરકારી કચેરીઓ સાથેના કામકાજ સબંધે સુગમતા થશે. આ નવું તાલુકા સેવા સદન બંધાતા સરકારની જુદી જુદી ૧૧ (અગ્યાર) જેટલી કચેરીઓ હાલ ભાડાના મકાનમાં બેસે છે અને ભાડા પેટે વાર્ષિક રૂ. પ,૧૭ લાખનો ખર્ચ સરકારે ઉઠાવવો પડે છે તે બંધ થશે.
માર્ગ મકાન વિભાગ દ્વારા લોકોને સુવિધા મળે અને લોકોનાં કામકાજ એકજ સ્થળે ઝડપથી થઇ શકે તે માટે ગોંડલ ખાતે સેવા સદન બાંધવાનું કામ ર૦૦૯-૧૦માં હાથ ધરાયું હતું. આ ભવનના બાંધકામ માટે સરકારશ્રી હસ્તકની ડેરી બિલ્ડિંગ કેમ્પસમાં રહેલી જમીનની ફાળવણી રાજકોટ, કલેકટરશ્રી દ્વારા કરાઇ હતી. માર્ગ અને મકાન વિભાગ દ્વારા અહિં ત્રણ માળનું ભવન રૂ. ૧૦૩૧.પ૪ લાખના ખર્ચે બંધાયું છે. જેમાં પ૪ જેટલા રૂમો છે. આ ભવનનું કૂલ પ૩૯૮ ચો.મી. બાંધકામ છે. આરસીસી ફ્રેમ સ્ટ્રકચર અને ભૂકંપ પ્રતિરોધક ડીઝાઇન અનુસાર બાંધકામ થયું છે.
આ કેમ્પસને આંતરિક કોંક્રિટ રસ્તા, પાર્કિગ સુવિધા વોટર હાર્વેસ્ટીંગ સીસ્ટમ, ડ્રીપ ઇરીગેશન, પાણીની સુવિધા માટે બોર અને પમ્પ રૂમ તેમજ વૃક્ષારોપણની સુવિધાઓથી સજ્જ કરાયું છે.
આ કેમ્પસમાં બેસનારી જુદી જુદી કચેરીઓ માટે જરૂરી ઓફિસ ફર્નિચરની પણ સુવિધા ઉપલબ્ધ કરાઇ છે.
રાજય સરકારના અભિગમ મુજબ ‘‘આપણો તાલુકો વાઇબ્રન્ટ તાલુકો’’ કચેરીના ખાસ એ.ટી.વી.ટી. સેન્ટરનું બાંધકામ પણ અહિં થયું છે.
આ કેમ્પસમાં નાયબ કલેકટર કચેરી, મામલતદાર કચેરી, સબ રજીસ્ટ્રાર, તિજોરી, માર્ગ મકાન વિભાગ, પંચાયત તેમજ સિંચાઇ વિભાગ, પ્રોહીબીસન એન્ડ એકસાઇઝ, એગ્રીકલ્ચર ઇન્સ્પેકટર, તોલમાપ, બાગાયત, સહકાર, વેચાણવેરા, શ્રમ વિભાગ, સીટી સરવે, એ.ટી.વી.ટી. સેન્ટર એમ જુદા જુદા ખાતાની ૧૮ કચેરીનો સમાવેશ કરાયો છે.
આ તાલુકા સેવા સદનના નિર્માણ માટે માર્ગ મકાન વિભાગના અધિક્ષક ઇજનેરશ્રી બી.જે.ભગદેવના માર્ગદર્શન હેઠળ કાર્યપાલક ઇજનેરશ્રી બી.આર.શાહ તથા નાયબ કાર્યપાલક ઇજનેરશ્રી એન.એસ.માકડીયા તેમજ મદદનીશ ઇજનેરશ્રી એન.કે.ત્રિવેદી વગેરેનો સહયોગ રહ્યો હતો.
ટિપ્પણીઓ નથી:
ટિપ્પણી પોસ્ટ કરો