ટંકારા તાલુકાના મીતાણા ગામની ઘટના સુરેશે મુક્કો મારી મોટાભાઈ મહેશ પારધીની આંખ ફોડી નાખી : દેશી દારૂ લેવા જતા હુમલો

તબીબીઓએ ઓપરેશન કરી મહેશની આંખનો ડોળો કાઢી નાખ્યો : જાણકારોમાં અરેરાટી

રાજકોટ તા.૧૨
ટંકારા તાલુકાના મીતાણા ગામે ગઈકાલે દેશી દારૂ લેવા ગયેલા મોટાભાઈ પર હુમલો કરી નાનાભાઈએ મુક્કો મારી આંખ ફોડી નાખી હતી. તબીબોએ ઓપરેશન કરી મહેશની આંખનો ડોળો કાઢી નાખતા પરિવારજનોમાં અને જાણકારોમાં અરેરાટી વ્યાપી છે.

પ્રાપ્ત વિગતો મુજબ ટંકારા તાલુકાના મીતાણા ગામે રહેતો અને દારૂ પીવાની ટેવ ધરાવતો મહેશ મનુ પારધી (ઉ.વ.૩૫) ગઈકાલે ગામમાં દેશી દારૂ વેચતા સુરેશ મોહન પારધી પાસે દારૂ લેવા ગયો હતો. ત્યારે કોઈ વાતની બોલાચાલી થતા કાકાના દિકરા નાનાભાઈ એવા સુરેશે મહેશભાઈ પર હુમલો કરી એક મુક્કો મારી આંખ ફોડી નાખતા મહેશભાઈને લોહી નીગળતી હાલતમાં દવાખાને ખસેડાયા હતા.

જ્યાં તબીબોએ ઓપેરેશન દ્વારા મહેશભાઈની આંખનો ડોળો કાઢી નાખતા તેમને આજીવન એક આંખ ગુમાવવાની ખોટ પડી ગઈ છે. રાજકોટ સિવિલ હોસ્પિટલ બિછાનેથી મહેશભાઈના પરિવારજનોએ પોલીસ અને તબીબોને જણાવેલ કે, મહેશભાઈ સેન્ટીંગ કામ કરે છે. અપરણિત છે. ૨ ભાઈ અને ૧ બેહેનમાં મોટો ભાઈ છે.

ગઈકાલે કાકાના દિકરા એવા ભાઈ સુરેશ પાસે દારૂ લેવા ગયો ત્યારે માથાકૂટ થઇ હતી. માતાએ પણ હોસ્પીટલમાં રોકકળ વચ્ચે વલોપાત કર્યો હતો કે, ઘરમાં કમાનાર દિકરાને આવી રીતે આંખ ગુમાવવાનો વારો આવતા હવે તે પરિવારનું કેમ ગુજરાન ચલાવશે ? આ બનાવના જાણકારોમાં પણ અરેરાટી વ્યાપી ગઈ છે.